شرح وظائف سوزوكى سياز

بواسطة : مهندس سامح

نبتدي باسم الله وعلى بركة الله:

مبدئيا في ذراعين في لوحة العدادات واحد على اليمين بجوار عداد السرعه وهنسميه ذ 1

والثاني على الشمال بجوار عداد ال RPM
وهنسميه ذ 2

اولا: لضبط الساعه:
1. دخٌل العربيه في وضع التشغيل اللي هيه التكة الثانيه على زر تشغيل السياره بدون الضغط على الفرامل
2. اضغط على ذ 1 و ذ 2 مع بعض في نفس التوقيت هتلاقي مكان رقم الساعه يومض.
3. حرك ذ 1 لليمين او الشمال لضبط الساعة المطلوبه.
4. اضغط على ذ 1 طغطه واحده للتثبيت.
5. هتلاقي مكان رقم الدقائق يومض هتعمل الخطوه 3 & 4 .
وبكده الساعه اتظبطت.

ثانيا: اعداد وظائف الكمبيوتر:
1. دخٌل العربيه في وضع التشغيل اللي هيه التكة الثانيه على زر تشغيل السياره بدون الضغط على الفرامل
2. اضغط ذ 1 مده حتى يكتب door ودي اول وظيفه والوظيفة دي فيها قسمين:
أ.ضبط فتح الابواب من الريموت عن طريق (طغطه واحده أو ضغطتين )على زر الفتح من الريموت او زر البصمه الموجود على اكرتي البابين الاماميين .

ب.الغاء أو تفعيل صوت الانذار عند فتح المسوجرات أو قفلها عن طريق الريموت او زر البصمه الموجود على اوكرتي البابين الاماميين

3. لف ذ 1 لليمين مره واحده هيظهرلك كلمه LIGht ودي ثاني وظيفه والوظيفة دي فيها قسمين:
ج.ضبط نور الدواسات الاماميه على انها تنور مع فتح الابواب ونور الكشافات الواطي أو انها تنور مع فتح الابواب فقط.

د.ضبط نور ذراع الاشاره بحيث انك لما تحرك ذراع الاشاره لفوق او تحت من غير تثبيته انه يعطي فلاش للاشاره الصفراء ثلاث مرات أو لا .

4. لف ذ 1 لليمين مره واحده هيظهرلك كلمه SECUry ودي ثالث وظيفه ودي عشان اذا كنت عايز تشغل نظام الامان او تلغيه

5. لف ذ 1 لليمين مره واحده هيظهرلك كلمه dEFAUL ودي رابع وظيفه و دي بتخليك ترجع جميع اعدادت الكمبيوتر و الوظائف للاعدادات الاصليه.

6.لف ذ 1 لليمين مره واحده هيظهرلك كلمه End ودي عشان تخرج من مود الاعدادات.

بالنسبه للبند ثانيا انا هقول كل وظيفه خطواتها بس واحه واحده اللي معطلني الشغل بس.

ثالثا: معلومات المسافات والبنزين:
في عندنا خمس حاجات:
1.عداد الرحله A
2.عداد الرحاه B
3.استهلاك البنزين الوقتي او الحالي
4.متوسط الليترات المستخدمه في المسافه المقطوعه (كام لتر لكل 100كم أو كام كم للتر الواحد)
5.البنزين اللي معاك يمشيك كام كيلو.

في الاول دخٌل العربيه في وضع التشغيل اللي هيه التكة الثانيه على زر تشغيل السياره بدون الضغط على الفرامل

بالنسبه لرقم 1 & 2 بالضغط مره واحده على ذ 2 للتبديل بينهم
والضغط على ذ 2 لمده عشان ترجع قيمتهم للصفر. والعدادين دول (A & B) يستخدموا لما تكون عايز تعرف المشوار اللي انت مشيته دا كان كام كيلو وفي ناس بتستخدمه عشان يعرفو التفويله عملت كام كيلو.

بالنسبه لرقم 3 & 4 & 5 :
لما تكون الشاشه واقفه على اي من العدادين ال A أو ال B اطغط على ذ 1
طغطه واحده هتعرضلك الشاشه AVG متوسط استهلاك العربيه ( اللتر مشاك كام كم أو كل 100كم استهلكوا كام لتر وللتبديل بينهم وانت على ال AVG دور ذ 1 لليمين هيتبدل معاك)
بعد ما خلصنا شاشة الAVG وانت عليها اضفط على ذ 1 هتعرضلك شاشة ال RANG ودي بتقولك البنزين اللي معاك يمشيك كام كم.
هتتغط ضغته كمان على ذ 1 هيعرضلك استهلاك العربيه (كام كم في اللتر)بس دا مش هيديك قرايه او ارقام الا لما تكون بتتحرك بالعربيه فعلا غير كده هيديك كذا شرطه.

رابعا: كيفية تغيير وحدة الحراره:
1. دخٌل العربيه في وضع التشغيل اللي هيه التكة الثانيه على زر تشغيل السياره بدون الضغط على الفرامل.
2. اضغط على ذ 1 مره واحده هيظهرلك RANG.
3.اضغط باستمرار على ذ 2 ودور او لف ذ 1 لليمين مره واحده هتلاقي ان وحدة القياس لدرجه الحرارة اتغيرت من C لل F ( من درجه مئويه لل الفهرنهايت ) و سيبها على الاختيار اللي انت عايزه.

خامسا: تفعيل فتح وقفل ذاتي لزجاج باب السائق:
لما تفصل احد كوابل البطاريه او اذا غيرت فيوز كهرباء زجاج باب السائق الخاصيه دي بتقف وبيبقى اللي شغال فيها الغلق الذاتي بس لكن الفتح الذاتي بيكون وقف وعشان تشغله ثاني هتعمل الاتي:
1. دخٌل العربيه في وضع التشغيل اللي هيه التكة الثانيه على زر تشغيل السياره بدون الضغط على الفرامل.
2.افتح زجاج باب السائق عن طريق الضغط على زر فتح الزجاج وافضل ضاغط عليه لغاية ما ينزل الزجاج كله في الباب.
3.اقفل زجاج باب السائق عن طريق رفع زر قفل الزجاج وافضل رافعه لغاية ما يقفل الزجاج كله فوق وافضل رافعه لمده ثانيتين ( تأكد ان الزجاج مقفول لغاية اخره) وبكده تكون اشتغلت خاصية الفتح والغلق الاوتوماتيكي لزجاج باب السائق.
الموضوع ده ما ينفعش لاي زجاج باب ثاني غير زجاج باب السائق.

سادسا:

في لمبه بيان في تابلوه العدادات علها رسمة بطاريه بس مش رسمة بطارية العربيه انما رسمه زي رسمة بطارية الموبايل بالظبط بس بالعرض دي هتنور لما تكون بطارية الريموت قربت تفضى وهتعرف انها فضيت لما تيجي تشغل العربيه تلاقي العربيه مابتدورش غير كده مش هتنور ولا هتنور حتى مع لمات ال chek. صفحة (2.67).

سابعا:

عشان تطفي العربيه لازم يكون الفتيس على ال P طب لو عايز تجيبها على ال N أو اي غيار ثاني بعد ما طفيت العربيه مش هيحصل، بس في طريقه تقدر بيها تنقل الفتيس على اي نقله بعد إطفاء الموتور والطريقه عباره عن:
على شمال عصاية الفتيس في غطاء مربع وفيه نتوء صغير عشان يتشال منه باي حاجه رفيعه هتلاقي تحتيه زرار اضغط عليه واستمر في الضغط وفي نفس الوقت امسك عصاية الفتيس واضغط على الزرار اللي بتتغط عليه عشان تحرك العصايه وبكده تتحرك معاك للنقله اللي انت عايزها. ودي بتفيد لما تكون واقف صف ثاني مثلا وعايز تقفل عربيتك وتأمنها وما تديش الريموت لحد عشان يحركها او لو لا قدر الله العربيه عطلت وعايز تقطرها.

ثامنا:

تفعيل وظيفه التحكم الذاتي في صوت الكاسيت ( AVC ) :
ودي بتزود صوت الكاسيت و تقلله على حسب سرعة العربيه.
مبدئيا في فالكسيت بكرتين اللي على اليمين هنسميها ب 1 واللي على الشمال هتبقى ب 2.
هتضغط على ب 2 لغاية ما يكتب على شاشة الكاسيت AVC بعدها اضغط ب 2 بعدها دور ب 2 هتلاقي ثلاث مستويات قلب بينهم و المستوى اللي انت عايزه اضفط عليه ب 2.

تاسعا:

ضبط ال EQ.
اضغط على ب 2 لظهور كلمة EQ ولما تظهر اضغط ب 2 هتظهر الانواع بعدها دور ب 2 واختار النوع اللي يعجبك واضغط بعدها على ب 2.

عاشرا: البلوتوث:

اضغط على زر اللى مرسوم عليه علامه البلوتوث من ورا لقدام مش العكس وهنسميه ز 1 هيظهرلك على شاشة الكاسيت Bluetooth Setup بعدها دور ب 2 لغاية ما يظهر Setup Bluetooth بعدها اضغط ب 2 بعدها دور ب 2 لغايه ما يظهر كلمة Pairing بعدها اضغط ب 2 بعدها ادخل على تليفونك ويكون البلوتوث مفتوح و اختار من تليفونك CAR AUDIO. هيشتغل معاك بس ممكن لبعض اجهزة المحمول بتحتاج Passkey لو التليفون عايزه الكاسيت هيكتبه على الشاشه بتاعته تنقله حضرتك وتدخله في التليفون وهيشتغل معاك

عشان ترد على مكالمه تضغط على الزرار المرسوم عليه سماعه مرفوعه من ورا لقدام مش العكس وهنسميه ز 2

عشان تنهي المكالمه تضغط على الزرار المرسوم عليه سماعه مغلقه من ورا لقدام مش العكس وهنسميه ز 3

لو عايز ترفع أو تقلل صوت المكالمه اثناء الكلام دور ب.1.

لو عايز ترفع أو تقلل صوت رنين المكالمه في السماعات يبقى قبل ما ترد دور ب.1.

لو عايز تختار نغمه للرنين لما تجيلك مكالمه:
اضغط ز.1 من ورا لقدام مش العكس هيظهر Bluetooth Setup بعدها دور ب.2 عشان يظهر Setup Telephone و اضغط بعدها ب.2 بعدها دور ب.2 عشان تختار Sound Setting واضغط بعدها ب.2 بعدها دور ب.2 عشان تختار Ringtone بعدها اضغط ب.2 بعدها دور ب.2 وقلب في النغمات واللى تختاره اقف عليه واضغط ب.2.

لو عايز تنقل سجل التليفون بتاعك على كاسيت العربيه عشان لما حد يتصل بيك يظهر اسمه مش رقمه:

اضغط ز.1 من ورا لقدام مش العكس هيظهر Bluetooth Setup بعدها دور ب.2 عشان يظهر Setup Telephone و اضغط بعدها ب.2 بعدها دور ب.2 عشان تختار Setup Phonebook واضغط بعدها ب.2 بعدها دور ب.2 عشان تختار Add Contacts بعدها اضغط ب.2 بعدها دور ب.2 عشان تختار Overwrite All (ودي عشان تنقل كل اللي في تليفونك للكاسيت) أو تختار Add One Contact (ودي عشان تضيف أي رقم جديد ) اختار اللي انت عايزه من الوظيفتين دول وبعدها اضغط ب.2 لتأكيد الاختيار. بعدها دور ب.2 عشان يديلك Confirm و اضغط بعدها ب.2 لتأكيد الاختيار. بعدها انقل كل الاسماء من تليفونك ولما هيخلص هيعرضلك على الشاشه Setup Phonebook.

وبكده تكون خلصت ( الكاسيت بيسجل لغاية 1000 رقم).