تقرير إستخدام الألتو لمدة سنه كامله

النهاردة هيكون مر سنة على استلامى للعربية من سنة عملت موضوع على نايل موتورز الحمد لله ربنا جعله سبب فى ان ناس كتير تعرف العربية اكتر وتشترى العربية كمان بسبب مشاركات الناس واسئلتهم وارائهم ( حوالى 990 رد على الموضوع الاصلى) .... ومع مرور سنة كاملة وعداد عامل 19340 كم بالظبط ... فكرت اعمل تقرير للعربية عن السنة اللى فاتت وتقييمى للعربية من جميع النواحى : 1- الحمد لله كنت من اوائل الناس اللى استلمو 2015 لانى مستلمها 10-8-2014 وكانت لسه مش منتشرة تماما ... فكان الريسك كبير بس كان اللى مطمنى شوية هو اسم سوزوكى
2- فى خلال سنة ... الحالة العامة للعربية تمام ... مفيش اى مشكلة واجهتنى ... مفيش اى حالات طارئة او غريبة حصلتلى ... مفيش اى اعطال الحمد لله
3- التكييف الحمد لله زى الفل .... الجو حر او مش حر ... الصبح او بالليل ... كفاءته ثابتة على الطريق ... ومازالت مشكلته الازلية انه بيأثر بشكل ملحوظ على سحب العربية ... وده مش عيب فى الالتو ... اى عربية اقل من 1300 سى سى التكييف هيأثر على السحب ( فى هذه النقطة احب اوجه الشكر لمراتى لانها هى اللى اقنعتنى انى اجيب الالتو بدل الماروتى عشان التكييف ... انا كنت مع نظرية ان ال 15000 جنيه فرق فى السعر مايخلونيش اجيب الالتو عشان التكييف ... استحمل الحر احسن واهى كلها عربيات صغيرة وانا مش فارق معايا موضوع الجرى على طريق والكلام ده فى مقابل انى اوفر 15 الف جنيه فى السعر ... بس بعد ما جبتها عرفت غلطتى ... الله يباركلك يا ام ياسين ...
4- العفشة ناشفة شوية مقارنة بعربيات تانية ... وده يمكن لانها عالية بشكل ملحوظ عن الارض
5- علو العربية ده ميزة جامدة جدا ... مع المطبات اللطيفة بتاعتنا عمر العربية ما حكت فى مطب
6- مفيش ولا سائل من السوائل نقص خلال سنة كاملة ... ولا مياه خضره ولا زيت فرامل ولا زيت موتور
7- البنزين ثم البنزين ثم البنزين ... موفرة جدا فى البنزين ... بحسبة بسيطة كده : انا عامل بالعربية 19430 كم بالظبط خلال السنة ... اللتر معايا بيمشى العربية فى المتوسط 18 كم ( مش هاقول 20 ولا 22 ... خلينا فى المتوسط ... 18 كم بس ) ... اقسم ال 19340 على 18 يساوى 1143 لتر ...اضرب فى 2.6 جنيه يساوى حوالى 2800 جنيه بنزين فى سنة ... لو انا معايا عربية زى الفيرنا او الاكسنت او اللانوس (متوسط اللتر بيعمل 10 كيلو ... مش هاقول اقل من كده ... خليها علينا احنا ) بنفس الحسبة تلاقى انى لو مشيت نفس المسافة اللى هى 19430 هادفع بنزين مقداره 5050 جنيه ... يعنى فرق 2250 جنيه فى السنة .... متخيلين الفرق ؟؟؟!!!
8- الكابينة الداخلية ضيقة ... وده واقع نظرا لان العربية اصلا صغيرة ... اتنين ورا مستريح .. اكتر من كده هاتبقى ضيقة عليهم ... وقدام لو حد ضخم الجسم شوية هايبقى متضايق فى القعدة خصوصا لو متعود على عربية اوسع

9- العجل بتاعها صغير ... وشكله وهو صغير كده موحش شكل العربية جدا ... الناس بتتغلب على كده بانها تجنط العربية ... عيب تانى فى الجنط الحالى وهو انه بيتعوج مع النقر والحفر ... ودى كانت شكوى من اكثر من مستخدم للالتو
10- قطع الغيار فى المتناول ... لا هى غالية اوى ولا هى رخيصة اوى ... والاهم انها متوفرة الحمد لله ... ماتعرضتش الحمد لله لغاية دلوقتى لتغيير اى قطعة بس كله متوفر الحمد لله
11- الشكل الانسيابى الجديد عامل جذب هام للعربية عن الشكل القديم ( زمايلنا اللى معاهم موديلات قديمة مايزعلوش ... وهى كلها ازواق برضو
12- مازالت مشكلة العربية الازلية بالنسبة ليه هى فقر الكماليات ... مفيش: باور - كاسيت - سنتر - انذار - مفتاح داخلى للشنطة - زراير ابواب - زجاج كهربا - اكصدام مش بلون العربية - مرايات رديئة جدا .... كل دى نقط ضعف ... منه لله الوكيل اللى منزلها كده عشان يزود مكسبه
اخيرا .... العربية حلوة جدا على قد فلوسها ... افضل عربية فى الفئة السعرية اللى هى 60 او 65 الف جنيه
ادعولى اخطف يوم اجازة كده واروح ارخص لانى كده دخلت فى شهر السماح وربنا يستر
اسيبكو بقى واروح افول لان العربية لو مشيت بيها تانى هاتشتمنى ...
اعذرونى لو نسيت حاجة وانا تحت امركم فى اى سؤال يخص الكونتيسة