أسئلة وأجوبة عن النيو الألتو ( اعرف اكتر عن الالتو)

بسم الله الرحمن الرحيم
بواسطة : محمد عاطف

موضوعى النهارده هيكون رد لاستفسارات اللى حجز العربيه بالفعل او المقبل على الشراء او اللى دخل الجروب يعرف اكتر عن سوزوكى التو (الموضوع طويل شويه خصوصا انى حاولت اجمع تقريبا كلا الاستفسارات اللى شفناها الفترة اللى فاتت )
فى ايجاز وبصورة عامه عن سوزوكى التو 2015
موتور 800 سى سى انجكشن , 3 سلندر , 48 حصان , 5 نقلات , تكييف , التانك 35 لتر , الالوان (احمر , فيرانى , ازرق , ابيض , سلفر , سماوى ) , جنط 13
نيجى بقى للاسئلة اللى بقينا بنشوفها بصورة شبه يوميه ومتكررة
موتورها 800 سى سى ضعيف ؟وهل هى زى الماروتى ؟

 
هل العربيه بتقدر تسافر؟
قبل اى شىء الموتور 800 سى سى محدش يقدر يحكم عليه بالفشل خصوصا ان الماروتى موتورها 800 سى سى ومعمر والعربيه منتشرة بصورة واضحه جدا وموديلاتها من التسعينات وجرايه ,, نرجع للالتو ,,, الالتو تختلف عن الماروتى فى ان الموتور حديث و انجكشن يختلف فى القوة والعزم وطريقة الحريق عن الماروتى لانها كربيراتير وبالتالى موتور الالتو اقوى وافضل والصانع مركب لها تكييف لعلمه بقدره الموتور على التحمل
خلاصة الكلام الـ800 سى سى مش ضعيف وبيعطيك افضل عزم وسحب بقدرته
ما شاء الله فى بعض الاعضاء بتروح مرسى مطروح , من سفاجا لشبين , القاهرة اسكندرية , السويس المنصورة وبتنجزهم فى الوقت وبيدخلوا من انبهارهم بادائها يكتبوا تجربتهم ( راجعوا بوستات الاعضاء هتلاقوا كلام يفرح )
العربيه بتجرى ؟؟
بفضل الله العربيه سحبها 10/10 وفعلا الموتور بيعطيك كل قوته 800 سى سى , سرعه 100 كم/ ساعه تجبها ع الغيار الرابع ومعاك لسه الخامس مفتوح دا لو انت غاوى , فى ناس جابت الـ140 كم و الـ150 كم ما شاء الله ولو طريقه مفتوح وشد العربيه هتجيب معاه
خلاصه الكلام العربيه ما شاء الله جرايه فعلا وربنا يقينا شر الطريق وشرها
العفشه ايه ظروفها وارتفاع العربيه عامل ايه مع مطبات مصر ؟؟
معنى كلمة حمالة قاسية لو جبناها فى كلمه واحده يبقى سوزوكى وسبق موديل الالتو سوزوكى ماروتى ومحدش اشتكى ,, الالتو عفشته كويسه جدا وحموله جدا وتركب خمس اشخاص وتجرى بيهم ولا فى اى حاجه وتطلع مطبات ولا تحك ودا حصل معايا شخصيا كنا 5 اشخاص ف العربيه ومعانا زيارة كمان فى الشنطه والله ما سمعت حكة مطب ولا صوت كده ولا كده
لكن متاكلش مطب وانت لوحدك وتقول اصل فى صوت كذا او كذا ,,, انت لو راكب المانى او يابانى واكلت مطب العربيه هتزعل وهتزعلك
العربيه

 مفهاش بور داانا هروح الجيم بقى عشان اعرف احركه وهبقى راكب 128 ؟
ايوه الفئة اللى نزلت مصر مفهاش باور لكن متقارنش عدم وجود باور لموديل 86 مثلا بموديل 2015 ,,, العربيه بمجرد الحركة الدركسيون بيخف معاك واحساسك بعدم وجود باور بيكون فى الركنه فقط دا لو انت بتلم الدركسيون كله من الثبات غير كده مفيش ,,, وبخصوص الجيم ممكن البنات اللى معاها التو فى الجروب تتكلم اكتر عن تقل او خفة الدركسيون
العربيه ضيقه وهتضايقنى فى الركوب ؟؟
قبل اى نقاش لازم تكون مقتنع ان تصنيف الالتو عربيه صغيره
ولكن مش بالضرورة انها صغيره انها تكون ضيقة ,, استخدام المساحة الداخلية كان فى افضل صوره ,,, العربيه بالكاد تحس انها صغيره اصلا واستخدام المساحه بصورة ممتازة ,,, الجزء الامامى طبعا الامور بالنسبه له مفيش منها مشاكل خصوصا ممكن تقرب وتبعد الكرسى عن التابلوه على راحتك ,,,الجزء الخلفى بيقد مرتاح حتى شخصين ولكن بتشعر بضيق المكان لو زاد العدد او على حسب الراكب ,,, الموضوع نسبى م الاخر ولكن نجزم بان العربيه مش ضيقه بالتصور التهويلى اللى الكل بيخاف منه
التكييف ثم التكييف هل ضعيف ولا كانه راكب ولا ايه ظروفه , هل بيأثر على السحب ؟؟
التكييف يعمل بصورة ممتازة ,,,بطلع من الشغل احيانا فى عز الحر والعربيه راكنه ف الشمس ومبيكملش 10 دقايق بتكون العربيه فعلا بارده, شخصيا انا رايح جاى مشغله وفعلا ممتاز
طب بيأثر على عزم الموتور؟
ايوه بيأثر على عزم الموتور ,, التاثير فى تجميع السرعه فقط ودا للى عاوز يجرى , انما لو سواقتك هاديه فانت مش هتحس اصلا انك مشغل تكييف ع الموتور
التكييف بياخد من عزم الموتور من 10% : 20 % ودا كويس جدا ومتنساس انك 800 س س وتانى هنقول دا عشان تجميع السرعه
بنظرة اوسع اى تكييف بياخد من عزم الموتور وبيظهر فى اى موتور اقل من 1600 سى سى فمنقدرش نقول انك مش بيأثر على 800 سى سى ( يبقى بنضحك على نفسنا ) .
كل كلامك دا فى اى عربيه بس مفيش عربيه بتنزل فاضية دى مفهاش لا كاسيت ولا سنتر ولا انذار ولا زجاج كهرباء !!!
فعلا مفيش عربية بتنزل من غير كاسيت وسنتر وانذار وبرضه مفيش عربيه محترمه فى مصر ب 59 الف جم ,,, دا حتى اقرب صينى بيلعب فى الستينات
يخصوص الكاسيت والسنتر والانذار تكلفتهم لا تتعدى الـ 1500 جم بالتركيب ودا لو انت جايب حاجه نضيفة ومعروفه فى السوق وهيبقى العربيه واقفه عليك ب 62 الف جم ,,, رد انت عليا وقولى بزمتك فى عربيه ماركة ومضمونة ومش صينى وزيرو موديل السنه ب62 الف ؟؟
انا ممكن اتفق معاك فى كلمه عربيه فاضية لو وصفك على ان مفيش منها كذا فئة او مفيش منها اوتو او مفهاش باور انما كاسيت وسنتر وانذار دا لو انت عاوز تمشى نفسك هتجبهم التلاته ب600 جم صينى
استهلاك البنزين ايه اخباره ؟؟
العربيه موفرة بمعنى الكلمة سواء بتكييف او بدون ... متوسط الاستهلاك بدون تكييف من 17 الى 19 كيلو للتر وبالتكييف من 15 الى 17 كيلو للتر
سمعت ان العربيه بتسخن ؟؟
لا اساس من الصحة ... محافظ على مقاس المياه وتكون مياه خضراء فى قربة المياه مش مياه من الحنفية , محافظ على مقاس الزيت ومتابعه باستمرار ,,, عمرها ما تسخن
صاج العربيه ورق ومبيستحملش ؟؟
مفيش حاجه اسمها صاج ورق وكل العربيات الحديثة كثافة الصاج فيها اقل من العربيات القديمة لكن مش لدرجة وصف صاج ورق ,,, الصاج طبيعى جدا زى اى عربيه وبعدين دى مش دبابة وكل الطرق الايام دى عليها حوادث ربنا يكفينا شرها ,,, ممكن تبص على العربيات اللى ب200 الف بتطلع ايه من حادثه ,,,يا رب سلم الجميع
وانا راكب تحس ان الموتور معاك صوته عالى جدا !!
صوت الموتور طبيعى مفيش فيه مشاكل , المشكله فى جودة العزل وفعلا سوزوكى ماروتى وسوزوكى التو تتصف بضعف العزل
هل ممكن اكبر فى الجنط وهل ينفع يتركب لها جنط اسبور بدلا من الحديد ؟؟
العربيه نازله بجنط 13 حديد ,,, مقاسه 13/70/145 وانت ممكن تغيره بجنط اسبور وتزود فى العرض مع تثبيت المقاس 13 وهيعطيك شكل افضل واداء وثبات كويس جدا
13/70/175 او 13/70/185
طب وقطع الغيار منتشرة ولا مش منتشرة ؟؟
انتشار اى قطع غيار لاى عربيه مقترن بانتشار العربيه ,,, منقدرش نقارن انتشار قطع غيارها بالفيرنا او اللانوس مثلا لكن نقدر نقول قطع الغيار موجوده وفى محلات مخصصة لسوزوكى والتوكيل موجود

بوجه عام قطع غيار سوزوكى معمرة ودا من احد اسباب نجاح الالتو عموما
سوزوكى التو موجوده فى مصر من 2003 ودا يعطيها سمعه حسنه انها حتى الان موجوده وكل سنه بينزل موديل و2015 اكبر دليل على نجاحها وقيامهم بتطوير شكلها لمسايرة الشكل الحديث من السيارات عربيه عملية اقتصادية متميزة فى فئتها