إستهلاك البنزين فى الألتو 2015

بسم الله الرحمن الرحيم

بواسطة : محمد عاطف

استهلاك البنزين وترشيده

اى حد عنده عربيه او بيفكر يشترى بيسأل على استهلاكها للبنزين وبما ان الالتو ما شاء الله عليها موفرة بمعنى الكلمة فلازم نحافظ على كده
مع الوقت والاستخدام الاستهلاك بيزيد ولو جيت حسبتها ولقيت استهلاك عربيتك زاد شخصيا بتقفل من العربية خصوصا انى رابط موضوع زيادة الاستهلاك بصحة الموتور وبالتالى استهلاك مثالى يعنى موتور مثالى يعنى استخدام مثالى , والعكس صحيح
حبيت اجمع النقط اللى بتأثر على استهلاك البنزين
1-تسخين الموتور قبل الطلوع ولو لدقيقة بيأدى لتوزيع الزيت فى كافة اجزاء الموتور بيأدى لسهولة دوران الموتور وبالتالى استهلاك سليم للوقود
2- التحرك المفاجىء (الفرك ) بيأدى لزيادة استهلاك الوقود

3-عدم نضافة فلتر الهواء بيأدى لزيادة ضخ البنزين لتعويض فرق الحصول على الهواء النضييف وبالتالى استهلاك اكتر للوقود
4-الزحمة (للاسف مصر كلها زحمه ) بتأدى لاستهلاك اكتر فى الوقود خصوصا اننا بنقف ونتحرك على الاول لاكتر من مرة ولعدة امتار فالضغط على الفرامل والحركة ثم فرامل ثم حركة بيادى لاستهلاك اكتر فى الوقود
5-ضغط الكاوتش .. انخفاض ضغط الكاوتش بيادى لزيادة استهلاك الوقود بسبب زيادة الاحتكاك والمقاومة
6-التكييف استخدام التكييف بيأثر طبعا على زيادة استهلاك البنزين (طبعا احنا داخلين على صيف ربنا اللى عالم بيه ) .
7- شبابيك العربية مفتوحة ,, لو مشوار طويل يا ريت تقفل الشبابيك او ميكونش مفتوح بشكل كلى عشان شباك مفتوح يعنى مقاومة عكسيه لسرعه العربيه وبالتالى ضغط اكتر على دواسة البنزين
8- ريحها فى الغيارات ... يعنى لا تبقى على الاول والتانى والتالت طول الطريق ولا تبقى قارص على الغيارات فى كل غيار
والاهم من كل ده الصيانة الدورية للعربيه والتاكد من دورية تغير فلتر البنزين وتغير البوجيهات عشان حتى لو التزمنا بكل اللى فات وفلتر البنزين مكتوم او البوجيهات مكربنة برضه هيفضل استهلاك كتير بل وهتخسر عزم الموتور
------------------------------
ازاى احسب استهلاك فعلى للعربيه
بعد ما يبقى التانك full صفر العداد قبل خروجك من البنزينة وشوف مشاويرك وبعد مرور مثلا 300 كيلو روح البنزينة تانى وشوف هتاخد قد ايه بنزين لحد full واقسم عدد الكيلوات ( اللى هما 300 ) على عدد اللترات هيطلع لك استهلاك اللتر
*اخترت 300 ك على سبيل المثال مش الالزام ممكن تحسبها بعدد شرط التانك بس اهم حاجه متنتظرش لانتهاء التانك عشان مع الوقت الظروف بتتغير يعنى هتيقف اكتر فى الزحمه او مشاوير كتير وسط البلد وبالتالى الاستهلاك بيزيد غصب عنك ومش بيعبر عن الاستهلاك الحقيقي للعربيه
يا رب اكون افدت...