بسم الله الرحمن الرحيم
بواسطة : محمد عبد العزيز
اولا : الموتور و الفتيسالموتور عملي جدا و استجابتة ممتازة مع وزن العربية الكبير نسبيا. الفتيس 5 سرعات اكثر من هايل ماحستش ابدا بتغير النقلة و عند الضغط علي البنزين بشدة بيسقط غيار و يدي تسارع جيد جدا للعربية بمنتهي النعومة
"من الاخر تسارع العربية ممتاز و مش هاتحس انك راكب بطة يعني "
ثانيا : الثبات
و صلت بالعربية لحد 140 كم/س ثباتها رائع و بتعمد اخد ملفات علي سرعة 100 كم/س مافيش اي مشكلة
"للاسف ماكنش فية فرصة أجري أكتر من كده "
العفشة دي اكتر حاجة في العربية مش عارف أقيمها
علي الطرق الممهدة العفشة رائعة و كمان في الطرق المكسرة ممتازة بس كنت مرتين سمعت صوت خبط صاج في مطب جامد خدتة بسرعة و كنت بسمع صوت تزيق ساعات بس بعد الصيانة الاولي كل ده راح الحمد لله
العربية عالية عن الارض ركبت 5 افراد و رحنا مشوار علي طريق كفر شكر كلة مطبات و ماكنش فية مشكلة
رابعا : الفرامل
الفرامل جيدة جدا بس مش ممتازة المهم انها بتوقف العربية في الوقت المناسب في الطوارئ
و انا جربت علي سرعة 140 كم/س ادوس فرامل جامد و اكسر يمين و شمال و كان الاداء و الثبات هايل جدا و العربية ما بتزحفش و متحكم فيا تماما
كمان تعرضت لموقفين علي الدائري و كانت رائعة
خامسا :الخامات و التقفيل
الخامات جيدة جدا و التقفل كمان فيما عدا عيب غريب جدا أن موكت ارضية العربية مش مطبع علي الصاج و فية فراغ بين الموكت و الارض معمول تقريبا بلباد مخلي الارض طرية بشكل غريب . كمان الكنترول اللي تحت الكراسي مش محمي بالمرة ممكن اي سوائل تتدلق في الارض توصلة بسهولة "ده عيب جامد بجد" لانة بيعطل العربية تماما و ثمنة غالي.
كرسي السائق فيه هزه خفيفة لما روحت الصيانة ماعرفوش يعملوا فيه حاجة و لاقيتة في كل العربيات تقريبا حتي الزيرو اللي معروضة
صوت باب النشطة أسوأ حاجة في العربية في المدقات المكسرة بس الحمد لله في الصيانة عالجوا المشكلة بنسبة 90% بالتشحيم و الضبط
التابلوه رائع جدا و خماتة فخمة
الكراسي ممتازة تصميم و خامات
صاج العربية محمل و قوي فعلا
الابواب تديك احساس بالقوة و المتانة
سادساً : الكاست و العدادات و الشاشات
الكاست صوتة رائع خصوصا في الهاي لاين مع 4 سماعة و 4 تويتر الصوت اكثر من ممتاز
عيب الكاست انه مافيهوش rds اللي بيجيب اسم محطات الراديو و البرنامج و مش بيظهر اسم الفولدر و الاغنية مع usb او cd
تصميم العدادات بسيط بس انيق و شيك
مؤشر البنزين مش دقيق يعني ممكن تمشي 200 كم و المؤشر لسة علي اعلي مستوي و بعدين بينزل فجأة و بيبقي علي النص بعد 400 كم مثلا و ده مش منطقي
الشاشة اللي بين العدادات بتظهر معلومات قليلة جدا هي عداد كيلوميتر السيارة و عداد كيلوميتر واحد فقط يمكن تصفيرة و استهلاك البنزين في اللحظة الحالية و متوسط عدد الكيلوميتر اللي ممكن تمشيها تبعا للاستهلاك .... مافيش مثلا معدل استهلاك الوقود لكل 100 كم او عداد لتغير الزيت "و ده مهم جدا" او استهلاك الوقود باللتر و المتبقي باللتر ..
ده رأيي و يا رب يكون مفيد و في الاخر
:: الخلاصة ::
حاجات حلوه في العربية :
الصاج
التقفيل
خامات الفرش و التبلوه
الموتور "و كمان سير كتيبنة جنزير"
الفتيس
النعومة
الارتفاع عن الارض
الثبات و الفرامل
الكاست و السماعات
حاجات مش حلوه في العربية :
تركيب موكت الارضية
الكونترول تحت الكراسي مش محمي
صوت باب الشنطة
قلة المعلومات علي الشاشة
..... و ربنا يحفظنا جميعا و يكفيكوا شر الطريق
