شرح أزرار تكيف الألتو

بواسطة : إبراهيم أحمد
موضوع تانى بس مهم جدا ... الموضوع عن شرح زراير تكييف الالتو
التكييف فى الالتو عبارة عن 3 بكرات وزرار مكتوب عليه a/c (ودى اختصار air conditioning ) ودراع صغير بييجى يمين وشمال

نبتدى بالبكر: اول بكرة على ايدك اليمين هتلاقى فيها 3 الوان احمر وابيض وازرق ... البكرة دى بتاعة درجة حرارة التكييف... بمعنى انك لو ظبطتها على اللون الاحمر التكييف هايبقى ساخن وده طبعا تظبطه فى الشتا ... والازرق ده ظبط التكييفعلى البارد وده طبعا فى الصيف ... واللون الابيض ده درجات مابين الساقع اوى والسخن اوى ... يعنى البكرة دى زى الثيرموستات بتاعة التلاجة كده
البكرة اللى فى النص دى بتاعة شدة الهواء الخارج من فتحات التكييف ... هما اربع درجات بيديك شدة هواء مختلفة . طبعا فى الوضع الزيرو ( اللى هو علامة المروحة ) يبقى كده التكييف مش شغال اصلا ... وعشان تبدأ تشغله تحول البكرة الى اول وضع اللى هو اضعف كمية هواء وتبدأ تعاير الموضوع هل الهواء ده كافى ولا تزود كمية الهواء كمان درجة او درجتين ... انا رأيي ان درجتين كافيين اوى على العربية ... ولو انت معاك ناس ورا والدنيا حر اوى ممكن تجيبه على 3 عشان الناس اللى معاك تحس اكتر بالتكييف

البكرة التالتة اللى على الشمال دى بتاعة انت عاوز الهواء بتاع التكييف يجيلك منين ... هل من الهوايات اللى موجودة قدامك ؟ ولا عاوز الهواء يجيلك من اسفل عند رجليك ... ولا عاوزه يجى من الفتحات اللى فى التابلوه عند الازاز الامامى عشان مثلا لو الازاز بتاعك مشبر من جوه بسبب بخار الميه اللى طالع من الناس اللى قاعدة فى العربية (وده طبعا بيبقى فى الشتا )وبيبقى الموضوع مفيد جدا ... بدل ما تقعد تمسح الازاز اللى قدام بايدك عشان تعرف تشوف الطريق ... ممكن تظبط البكرة على اقصى وضع ناحية اليمين هتلاقى التكييف بيطلع الهوا من الهوايات اللى عند الازاز بس
عامة عشان ماتتوهش ... هما 5 اوضاع للبكرة اللى على اليمين هناخدهم من الشمال لليمين:
1 - الهواء من الهوايات الامامية اللى فى التابلوه فقط
2 - الهواء من الهوايات الامامية والهوايات اللى عند الرجلين
3 - الهواء من الهوايات اللى عند الرجلين فقط
4 - الهواء من الهوايات اللى عند الرجلين والهوايات اللى عند الازاز الامامى
5 - الهواء من الهوايات اللى عند الازاز الامامى فقط
كده خلصنا البكر ... فاضل الزرار والدراع
الزرار اللى مكتوب عليه a/c : ده اللى بيشغل الكمبريسور بتاع التكييف ... بمعنى انك لو ماشغلتهوش وشغلت المروحة فقط يبقى انت كده كانك مركب مروحة فى العربية ... هاتجيب هوا بس ... بس مش ساقع ... هايبقى هوا حسب درجة حرارة الجو ... لو الجو حر هتلاقى هوا سخن جدا طالعلك من الهوايات ... ولو الجو برد هتلاقى هوا بارد

يعنى الزرار ده لو مطفى يبقى انت كده معندكش تكييف ... ولو شغال يبقى انت كده مشغل التكييف
(طبعا لازم يكون شغال وفى نفس الوقت تبقى انت مشغل البكرة اللى فى النص بتاعة المروحة ... لو شغلته هو بس والمروحة مقفولة ولا كأن التكييف شغال اصلا)
كده مش فاضل غير اخر حاجة واهم حاجة لان الناس دايما بتهمل وظيفته وده بيبقى ليه تاثير مباشر على اداء التكييف ... الدراع
الدراع ده اللى هو موجود تحت البكرة اللى فى النص ... وده ليه وضعين ... يمين وشمال
الناحية الشمال ... الوضع ده زى ما هو باين فى الرسمة بيبرد الهواء من داخل العربية فقط .... مش بيجيب هوا من الخارج ... وده طبعا افضل لاداء التكييف لانه بيبرد الهواء اللى هو كان مبرده قبل كده ... فمش بيحتاج يبذل مجهود فى التبريد كتير ... هو بيبرد الهواء مرة واحدة وبعدين التبريد بعد كده بيبقى اسهل للتكييف لانه الهواء موجود داخل العربية بارد
الوضع اللى على اليمين ... ده بيجيب هواء من خارج السيار ويبرده ويطرد الهواء اللى كان جوه ... يعنى بيجدد الهواء بشكل تلقائى ... وده معناه ان التكييف هايفض يبرد فى هواء سخن جاى من برة العربية على طول ... وده طبعا بيخليه شغال باقصى طاقة على طول وده مش حلو على اداءه
كل حاجة طبعا ليها ميزة وعيب ... يعنى الوضع اللى على الشمال لو شغلته ومافتحتش الشباك لمدة 3 ساعات مثلا لو رايح اسكدندرية وماشى براحتك ... الهواء هايفضل موجود ومش هايتجدد والناس اللى فى العربية هتحس ان الهواء مش نقى وممكن تتخنق من قلة الاكسجين ... اغلب تعليمات تشغيل المركبات بخصوص التكييف بيقولو انك لو شغلت الوضع ده ماينفعش اكتر من 45 دقيقة ... لازم تقلب على الوضع التانى 5 دقائق او تفتح شباك العربية ... عشان الهواء اللى فى العربية يتجدد
بردو من فوايد الوضع اللى على اليمين : انك ممكن تفتح المروحة بس وتقفل زرار ال a/c وتخلى الدراع على الوضع اليمين
هتلاقى هوا طالعلك من الهواية وجاى من برة العربية ... ده مفيد لو انت ماشى بالليل والجو حلو بره وانت مش عاوز تفتح الشباك عشان الصوت لو انت ماشى بسرعة عالية ... ممكن تعمل الحركة دى وتستغنى عن فتح الشباك
اسف للاطالة ...