وظيفة الفلاتر و البوجيهات و ازاى تعرف انها اصلية

بسم الله الرحمن الرحيم
  كتب : Yahia Ashraf


حبيت النهارده اعمل موضوع نفسى اعمله من زمان و هو انى اشرحلكم بعض الاجزاء الهامه فى السيارة و كمان ازاى تعرف ان قطع الغيار اصلية ولا تقليد وانتوا عارفين ما شاء الله مصر فيها كمية بضاعه تقليد مش موجوده فى أى مكان

هنبتدى بفلتر الزيت

ايه وظيفته ؟؟

ده بيساعد على تنقية زيت المحرك من الشوائب اللى بتنتج من احتكاك الأجزاء المتحركه وكمان نواتج الاحتراق و ده بيساعد على تقليل الاحتكاك وبيعمل اداء عالى



طب لو مغيرتش فلتر الزيت فى مواعيد الصيانه الدورية ايه اللى هيحصل ؟؟

بكل بساطه اللى هيحصل يا سيدى ان هيحصل انسداد للفلتر من الشوائب وده بيترتب عليه :-
1- ان الاحتكاك هيزيد داخل المحرك وطبعا هيزيد معدل تأكل الأجزاء الداخلية
2- هتلاقى المحرك ادائه بيقل معاك تدريجيا وبرده هتلاقى استهلكا البنزين بقى عالى عن الطبيعى وممكن توصل لا قدر الله انك تعمل عمرة محرك


طب يا عم هسمع كلامك بس انت عارف كل حاجة فى السوق مضروبة دلوقتى اعمل ايه ؟


تعالى انا اقولك الفرق بين فلتر الزيت الاصلى و التقليد

:: الأصلى ::


 

 هتلاقى خشو الفلتر الأصلى مكون من طبقتين ( طبقة خشنه من برا وطبقة ناعمه من الداخل )
وطبعا بيقوم بتنقية الزيت بكفائة عاليه
الطبقة اللى بره دى فيها مسام ففايدتها انها بتحجز الشوائب الكبيره اما الطبقة اللى بالداخل فدى بتحجز الشوائب الصغيرة


نيجى بقى للتقليد

:: فلتر زيت تقليد ::



الفرق بينه و بين الاصلى ان الحشو بتاعه بيكون مكون من طبقة واحده يعنى كده بيسهل انسداده وبالتالى هتلاقى انك لازم كل شوية تغيره فخلى باكل و انت بتشترى متسترخصش لانك لو حسبتها هتلاقى ان اللى هتدفعوا كل شوية فى المضروب اغلى من المره اللى هتشترى اصلى فيها ده غير انك هتحافظ على عربيتك

نصيحة كمان : اوعى تنخدع بالشكل الخارجى او شكل العلبة لانك ببساطة لا يمكن هتقدر تفرق ما بينهم وكل حاجة دلوقتى بتتقلد بمنتدى الدقة



فلتر الهواء

ايه وظيفته فى الدنيا ده ؟

ده يا سيدى بيمنع الأتربة و الشوائب الموجوده فى الجو من الدخول للمحرك

طب هيحصل ايه لو مغيرتهوش ؟

هتلاقى فتحات فلتر الهواء مسدوده يعنى هتلاقى نسبة الهواء اللى داخلة المحرك قليلة وده بيادى الى ان اداء المحرك بيقل معاك يعنى سحب ضعيف وزيادة فى استهلاك الوقود عن المعدل الطبيعى

طب ازاى اعرف فلتر الهواء الاصلى من التقليد ؟

:: فلتر الهواء الأصلى ::



وده بيتكون من 3 طبقات
الطبقة اللى برا بتحجز الاتربه والشوائب الكبيرة والطبقة اللى فى النصف بتحجز الشوائب و الاتربة المتوسطه و الطبقة الداخلية بتحجز الاتربة و الشوائب الصغيرة


أما التقليد بقى

:: فلتر الهواء التقليد ::

فده بيتكون بقى من طبقى واحده بس يعنى عمره ما هيقدر يحجز الشوائب باحجامها المختلفه وهيتسد بسهولة



نيجى بقى
لفلتر البنزين
ونيجى للسؤال المشهور

ايه وظيفة فلتر البنزين ؟؟

ده يا سيدى بيساعد على تنقية الوقود من الشوائب و الماء كمان بيحافظ على مكونات دورة الوقود

طب يا عم الحج لو مغيرتهوش هيحصل ايه ؟

هيتسد الفلتر وبالتالى هتلاقى كمية الوقود اللى بتدخل للمحرك بتقل بشكل كبير نسبيا و هتلاقى انسداد فى أجزاء دورة الوقود يعنى هيبقى لازم تغيرها ودى تكاليفها غالية

ومن العلامات اللى تعرف منها ان الفلتر مسدود ان العربية ممكن تبطل منك وانت بتبتدى الحركه او وانت بتطلع كوبرى او اى مرتفع

طب ازاى اعرف فلتر البنزين الاصلى من التقليد ؟؟

:: فلتر البنزين الأصلى ::

الفلتر بيحتوى على الياف من الزجاج و البوليستر و الورق يعنى بالبلدى انسى ان الشوائب تقدر تدخل لدورة الوقود


:: فلتر البنزين التقليد ::

مفيهوش اى حاجة بقى من اللى انا قولتها
يعنى هينسد بسرعه جدا



نيجى بقى للبوجيهات

ايه وظيفة البوجيهات دى ؟؟

دى وظيفتها اشعال الهواء و الوقود المضغوط من خلال الشرارة المتولده وده بيادى الى دوران المحرك

على فكرة : بنقول عليها أحيانا شمعات الاشتعال


طب ازاى اعرف ان البوجيهات عايزة تتغير ؟؟

تعالى أقولك هو فى كذا علامة بتدل على انها عايزه تتغير
1- تلاقى ان العربية بتدور بصعوبه معاك
2- انك تلاقى ان دوران المحرك غير منتظم
3- انك تلاقى فيه زيادة فى استهلاك البنزين ملحوظ
4- انك تلاقى اداء المحرك بيقل معاك
5 - انك تشم رائحة شياط


طب ازاى اعرف البوجيهات الأصلى من التقليد ؟؟


:: البوجيهات الأصلى ::

دى يا سيدى بتحتوى على الكترونى على شكل حرف U وده بيديلك افضل اداء للمحرك وبيقلل من استهلاك البنزين


:: البوجيهات التقليد ::

مفيهوش أى حاجة من اللى قولتها و بيادى لزيادة استهلاك البنزين معاك غير انه بيقلل من اداء المحرك معاك