الموضوع ده لاقيته على جروب نيسان تيم على الفيس بوك بواسطة الزميل Ahmed Essam Mostafa عجبنى وقولت انقله للإفادة
السادة الكرام ...
سلام الله عليكم ... ده تقرير واضح عن عربية نيو صني بعد 80 ألف كيلومتر قيادة ... آه أنا عارف الرقم. يعني تقريباً محيط الأرض مرتين ... يعني بالتأكيد انا عارف باتكلم عن إيه ومش بافتي ولا لسة واحد صاحب ابن خالة جدتي جابها من يومين فانا باكتب عنها ... أعتقد كلامي واضح
هاتكلم عن كل جزء بالتفصيل علشان المهتمين سواءً بالعربية كشراء أو كمحافظة عليها أو كأسلوب قيادة آمنة... توكلنا على الله
العربية ما هي إلا جسم ... موتور...نظام تعليق ... نظام جر ... ثبات واتزان وفرملة ... وطبعاً توكيل وصيانة
الجسم خفيف ... ده شئ مفروغ منه ... مصمم لكذا حاجة: تخفيف وزن العربية وبالتالي تقليل استهلاك البنزين ... ومعمول علشان يتفرتك تماماً عند الصدمات وينقل كامل الخبطة للأجزاء البعيدة عن مقصورة الركاب...هاتلاقوا في كل الحوادث واختبارات التصادم (سواءً لنيسان أو فولفو أو غيرها من الماركات المحترمة) ان مقصورة الركاب بتفضل سليمة إلى حد كبير وده في حد ذاته هو الهدف من تخفيف وزن وسمك الصاج والأجزاء الأمامية ...
تصميم العربية شكله مبعجر وشبه البتنجانة المستوية ... مش مهم انا هاستعملها للانتقال مش هاتجوزها لكن بيخليها ثابتة عالسرعات العالية وكمان باحس بمطبات الهواء المتشكلة بواسطة العربيات الكبيرة وهي معدية جنبي حتى لو انا واقف تماماً وسرعتي زيرو ... كل شئ وله مقابل
ارتفاع العربية عن الأرض كويس جداً ونادراً ما بتحك في مطب (مطب غبي زي اللي عامله طبعاً) وده شئ ممتاز للطرق المصرية الأليفة ! ... وكمان ارتفاع العربية سلاح ذو حدين: بيزود ضغط الهواء فوق السيارة عند السرعات العالية لكن في المقابل بيخلي التحكم في السيارة صعب عند المناورات الحادة عالسرعات العالية ... ولا يفضل بأي حال من الأحوال التلاعب بالعربية دي بالذات على سرعات كبيرة ... لو هاتجري بشكل آمن عليك وعلى اللي معاك وحواليك لازم تكون في خط مستقيم على طريق سريع ... غير كدة بلاش هبل واستعباط ...
العربية مصممة للمدينة وللسفر الطبيعي ...مش عربية شد وجري وسباقات ... والكلام ده نعيد ذكره بإذن الله عند نقطة المحرك
الشنطة الخلفية مرتفعة وده بيتسبب في إعاقة الرؤية بشكل كبير عند الرجوع للخلف والركنة بالضهر ... يستحسن تركبلها حساسات ركن وكاميرا خلفية...وذكرت ليه العربية مرتفعة عن الأرض (خصوصاً الجزء الخلفي)
البطارية بتنزل في الكثير من العربيات من الموديل ده 40 أمبير ... ده كافي لتشغيل كل التجهيزات الأساسية... أقصى حد ممكن تجيبه هو بطارية 60 أمبير وأكتر من كدة مالهوش لازمة لأن الدينامو مش هايشحنهالك بأكتر من 60 أمبير.
الإضاءة ممتازة جداً ... مش هاتحتاج (تحت ظروف التشغيل العادية وبدون لعب في الكهرباء) إلى تغيير أي لمبات قبل خمسين ألف كيلومتر بإذن الله ... اللمبات Osram أصلية وموجودة في التوكيل ... الواطي بخمسة جنيه اللمبة والعالي بخمسين ! كشاف الـ "ضباب" ده مجرد لإضاءة ما هو أمام وتحت العربية وهاينفع جداً في كشف المطبات المستخبية المعمولة بنظام شوراعنا تتحدى الملل !! مافيش ضوء بيخترق الضباب مهما كان طوله الموجي علشان كدة انا ضد مصطلح "كشاف ضباب" ده من أصله.
المساحات لطيفة لكن يستحسن تغيرها بنفس المقاس وماتتلاعبش فيه ... ولاحظ ان مواد التنظيف اللي بيحطها التوكيل فوق مية المساحات بتؤدي لنشفانها في المستقبل .... ياريت تكتفي بالمياه العادية وفوقها بعض قطرات جلانس أو ويندكس بتاع الزجاج ... وعن تجربة : المياه لوحدها أنضف في الطرق العادية (لو طرقك زراعية ومليانة هاموش وحاجات بتلزق في الزجاج ابقى زوده جلانس)
المحرك: بدون مبالغة, نص استهلاك المحرك السابق للبنزين للنيسان الشكل القديم ... لاحظ انه 1500 cc وده بالتالي بيفرق بشكل طفيف في قدرات التسارع, اللي هي معمولة علشان خفض استهلاك البنزين. العربية تحت سرعة 60 كيلومتر ساعة بطة بلدي بدون مبالغة, لكن لو حست بانك محتاج تتسارع بتتحول إلى كائن غير أليف فوق سرعة 60 ... ماشاء الله صوت المحرك بيكون منخفض جداً (استعمل زيوت محترمة وأصلية ... الأفضل فالفولاين وليكوي مولي وأحياناً شل العشرتلاف كيلو ... غير كدة مارجحلكش خالص ومش هاتحس بنعومة المحرك). مع صيانتك لعربيتك بشكل محترم ومع إضافتك لمنظف تانك البنزين STP الفضي مع كل تغيير زيت هايكون استهلاك العربية في المتوسط 550 كيلومتر لكل تفويلة تانك
المحرك في التسارع لا يقارن بمحركات هيونداي المتوحشة اللي بتجري على روحها ! بس كمان لاحظ انها محركات عمرها الافتراضي قصير وشرهة للبنزين وغير كاملة الكفاءة. علشان كدة العربية دي مش معمولة للجري واللعب في الشوارع زي المجانين. دي عربية اقتصادية متوسطة تكفيك لمشاويرك العادية وللسفر واستعمال الأسرة.
الجدير بالذكر ان صوت المحرك بيكون عادي أول ماتدور العربية وتسخنها ... وبيهدأ بعد الحركة بفترة
نظام التعليق: العربية حمالة قسية ... شافت كتير وتحملت كتير في طرق مصر اللولبية الخزعبلية ... والحمدلله راضية بحالها وصابرة العفشة هاتبان على أصلها بعد ما تغير الكاوتش من "ماكسيس" (ده بالنسبة للغلابة اللي زيي كانت نازلالهم العربية بيه من المصنع وهو كاوتش ردئ جداً ومش بيتماسك مع الأرض ولا بينفع وقت الفرملة ولا بيعمل اتزان على أي سرعة) إلى نوع كويس ومحترم... جوود يير .. كونتينيننتال ... بريدجستون ... سيموتومو إلخ ...ساعتها هاتحترم بجد نظام التعليق وترفع له القبعة ! ماشاء الله ,, ومش هاكتر في الكلام هنا. وده بالمناسبة بيؤثر على كفاءة الفرامل وبيضعفه طالما انت سايب كاوتش ردئ فيها تماسكه مع الأسفلت وحش جداً ... وكمان هايتسبب في ان فرامل الـ ABS تشتغل كتير وهايقلل من عمرها الافتراضي
لكن هاتحتاج كل فترة انك تكشف بشكل دوري واحترازي على الاتزان والزوايا ... على سلامة المقصات... على كاوتشة التراب للمساعدين (ودي عمرها من 65 ألف كيلو بيبدأ ينتهي)...
أحياناً بيكون فيه صوت تزييقة بسيطة وانت بتركب العربية أو تنزل منها ... التوكيل المصون كان بيقول انها من الكنبة (خاب وخسر من قال ذلك !) هو بس العربية محتاجة تشحيم ... دي كل الحكاية !
الجيربوكس...الفيتيس...وهنا باتكلم على الأوتوماتيك للأسف ماستعملتش العربية المانيوال منها
كثرت الأقاويل عن عدد النقلات ... الفيتيس الأوتوماتيك 4 نقلات فقط في النيوصني...وتفسير انه فوق 120 بيدي نص نقلة دي علشان زيادة تسارع المحرك ليس أكثر ... ومافيش نص نقلة في فيتيس النيوصني ... عندي مثلاً في الشغل عربيات فيها 22 نقلة وفيهم انصاص ... والحلوة خوخة(النيوصني) مش هاتيجي جنبهم حاجة لأن دول استعمالاتهم مختلفة كلياً عن ناقل حركة لعربية سيدان غلبانة
مافيش إحساس بنتشة النقلات المعتادة في الأوتوماتك ... فقط من الأول للتاني عند المطبات وفقط عند المطبات علشان فرق السرعة بين الحركة الفعلية وبين حسابات كومبيوتر العربية بيتغير لمدة ثانية بسبب تأثير المطب على سرعة العربية ... حلوة دي.؟
زيت الفيتيس المفروض اربعة لتر ...ده اللي جوة ... غير كدة بيكون مستعمل للتنظيف وممكن التوكيل يحاسبك على أكتر من كدة للأغراض السابق ذكرها
بيتغير زيت الفيتيس من 60 ألف كيلومتر وطالع ... أحياناً بعد مايكشفوا عليه يطلع انه مش محتاج يتغير حالياً ... لكن هايتغير خلال العشرين ألف كيلومتر التالية.
المحرك ساعات بيحتاج منك تدخل علشان توفر استهلاك البنزين ...لسبب أو لآخر مش بيقلل لفات المحرك وصوت الموتور بيفضل عالي رغم انك خلاص وصلت للسرعة المطلوب الوصول إليها ... ساعتها هاترفع رجلك لمدة ثانيتين من عالبنزين وترجعها زي ماكانت بالظبط ... المحرك هايظبط نفسه تاني لوحده .
لمعلوماتك: عدد لفات المحرك الطبيعية على سرعة 80 كيلومتر بتكون 2000 لفة. على سرعة 100 بتكون 2500 لفة ... على سرعة 120 بتكون 3000 لفة بالتمام والكمال . خدها مقياس ولو عدد اللفات زاد يبقى اعمل الحركة المذكورة فوق ولو فضل زي ماهو يبقى محتاج تظبيط بسيط في التوكيل...غالباً بيعملوا ريسيت لبعض الحساسات في المحرك (الكلام ده موجه للي اشتكوا في بعض الحالات النادرة من زيادة استهلاك البنزين للنيوصني) وهارجع تاني واقول ان التفويلة 41 لتر بتعمل 550 كيلومتر مستريح ... وهاتعمل أقل من كدة لو مشوارك اليومي مش كبير وبتسخن العربية كل يوم مرتين تلاتة ... طبيعي توصل 480 كيلومتر تقريباً لكامل التانك
دواسة البنزين كهرباء مش متوصلة بالكاربياتير بسلك ... بتحسب ضغطة رجلك وتتعود عليها ... وكمان مش بتغير مستوى التسارع لو رجلك ضغطت وفكت كذا مرة بسرعة في فترة قصيرة ... معمول حساب تأثير اهتزازات الطريق على رجلك علشان كدة هاتحافظ على مستوى سرعة العربية ....عايز تغيير سريع في سرعتك ارفع رجلك من الدواسة واضغط تاني بشكل اقوى بعد ثانيتين.
نيجي للنقطة اللي الكل منتظرها: الفرامل !
في الأول كنت من الشريحة اللي جرالها استدعاء للعربية وغيروا حاجة اسمها "صاجة التيل الخلفية" وده عبارة عن الـHousing اللي بيتحط جواه التيل وكانت تكلفته عالية وتحملها الضمان بالكامل...ومن ساعتها ولحد حالاً التيل ماحتاجش يتغير وخلص نصه تقريباً بس , الحمدلله رب العالمين (باتكلم عالتيل الخلفي). العربية كانت بتعمل صوت زي صوت التريللا عند الفرملة على سرعات بطيئة. والحمدلله راحت تماماً
طلعوا بأن فيه كذا عربية محتاجين استدعاء لتغيير ماستر الفرامل...الحمدلله طلع متغير بالفعل في المصنع ... واتغير للناس على حساب الضمان
إشاعة كانت بتقول ان فيه شحنة إيرباجز كانت بايظة ونيسان هاتستدعي العربيات في مصر...اللي حصل ان فعلاً شركة يابانية لوسائد الهواء كان عندها إنتاج معيب اضطر نيسان تصرف ملايين الدولارات على استدعاء عربياتها. لكن جوة مصر ده ماحصلش ...لست أدري ما هو السبب
لكن اللي فوق بيقول ان التوكيل كان بيتحمل مسئوليته ... لما بيوصللهم العيب بيصلحوه وعلى حساب الضمان...ده بقى مايمنعش ان الفتايين موجودين في كل مكان وبالذات في التوكيلات وكانوا بيمنعوا العملاء من حقوقهم في حالات كتيرة ويصروا على ان الضمان مايتحملهاش
يعني الفرامل الأمامية: كانت نوعية مجموعة الفرامل كاملة (تيل-طنابير-كاليبرز) رديئة ومش متجانسة...التيل كان ياكل الطنابير والطنابير تبوظ التيل والصفارة في النص هايصة ... تحس انك سايق تاكسي لادا ماشي 250 ألف كيلومتر
المشكلة حصلت معايا زي باقي الناس... كانت الصفارة بتظهر بعد حوالي عشرتلاف كيلو قيادة... التوكيل في الأول "السبع" راح مدفعني تمن التيل... لكن "أوتو إيجيبت" غيرولي تيل وطنابير 3 مرات على حساب الضمان وآخرهم كان تغيير كامل لكل مجموعة الفرامل ! من ساعتها الدنيا تمام وماشي حوالي 15 ألف على التيل...وكل مايصفر بيصنفروه ولسة باقي فيه شوية كمان بإذن الله
التيل الجديد (مش لنيسان فقط بل لكل الماركات) طالما هو ماشي بنظام كربون , اتشال منه مادة اسمها أسبستوس ... والمادة دي بقت ممنوعة دولياً لأنها مسرطنة وبتسبب السرطان عند الاستنشاق. ممنوعة في الفرامل وممنوعة في مواد البناء حالياً. ودي بقت تخلي كل أنواع التيل عمرها قصير وبيلعب في مدى من 10 إلى 20 ألف كيلومتر فقط
أفضل تيل هو التيل السيراميك وده بيحتاج تغيير كامل لمجموعة الفرامل وبتكون طنابير معدنية مخرمة زي عربيات السباق, هي ممكن تكون غالية لكن التيل بيعدي 70 ألف كيلومتر علشان كدة تمنها فيها. وده هاعمله بإذن الله أول ماخرج من الضمان !
العربية فيها Brake Assistant وده وظيفته يكمل معاك الفرملة لو رجلك ضعيفة أو كان راجل كبير مش قادر يضغط. بيحس بمدى فجائية الضغطة وعلى أساسها بيكمل الفرملة لوحده وللآخر ... ده بيفسر ليه لو واحد بادئ يتحرك بالعربية وفرمل العربية بتكلبش في الأرض مرة واحدة من نفسها لو عمل أي فرملة سريعة.
فرامل العربية كأداء ممتازة جداً جداً ... يعني لو انت محافظ عليها هاتلحقك بإذن الله والستر والحفظ كله من عند الله, لكن الفرملة كسبب من الأسباب ممتازة للغاية. لاحظ ان لو الصوت بتاع الفرامل علي ومشوار البدال بقى طويل ومابقتش تمسك زي الأول...ماتروحش تلزق في العربية اللي قدامك ووقت مايقف تلبس فيه وتروح تقول ده عيب الفرامل هو اللي عمللي حادثة ! ربنا عرفوه بالعقل. لكن لو احتجت فرملة والفرملة ماشتغلتش (لاحظت الكلمة؟) ساعتها تعمل مابدالك وهايكون حقك. لأن خاصية رئيسية انت دافع تمنها ماشتغلتش. وده يفرق بشكل كامل عن خاصية تم استهلاكها ومحتاجة صيانة وأداءها كان وحش بسبب كدة. أكيد تفرق
أعتقد ان لما اقول الكلام ده هايكون بناءً على خبرة زي ماسبق وحكيت ... لا انا عينيا ضيقة ولا اسمي الحاج نيسان علشان يكون ليا أي نوع من أنواع الاستفادة منهم ... علشان كدة هاتلاقي كلامي حيادي وصريح وبيحكي اللي حصل بالظبط. فلو سمحت لو العربية مش عاجباك كدة وخلاص ماتجيبهاش أو روح بيعها. انما ماتتسببش في حالة من البلبلة والتذمر بين ناس دافعين شقا عمرهم فيها ومحتاجين يحسوا بقيمتها الحقيقية...لأنها عربية جيدة ماشاء الله وتنفع في معظم الاحتياجات (باستثناء الشد والجري والحرق والغرز على سرعات عالية)
العربية من جوة كتجهيزات عادية جداً ...هي واسعة بشكل جميل الحمدلله ودي حاجة ممتازة. لكن خامات التقفيل مش جيدة وخصوصاً التابلوه اللي بيزقزق لو انت شغلت التكييف ساخن في البرد ... حجم البلاستك تقريباً بيتمدد وتحس انك راكب ميكروباص الترامكو كل حتة في التابلوه بتاعه رايحة في ناحية ودي حاجة تؤخذ بشدة على نيسان انها تطلع تجهيزات داخلية بالشكل الردئ ده. أنصح بعمل فرش جلد علشان تحس انك راكب عربية شيك بدل الفرش اللي جاي فيها.
لمعلوماتك:
الفيتيس فيها ياباني صنع في اليابان
المحرك بتاعها مش نفس المحرك في أمريكا الشمالية, هناك المحرك 1600 وكمان اسمه إكس ترونك سي في تي
الدينامو مصنع في شركة ميتسوبيشي في اليابان
الضفيرة الخاصة بالكهرباء تصنيع مصري خالص في مصنع هنا في القاهرة
الفرش الداخلي تصنيع شركة سبير كار هنا في مصر
الفوانيس مصنوعة في الهند ... ووزنها أخف بكتير مما كنت تتخيل !
المحرك نفسه مصنوع في اليابان
معظم الأجزاء الداخلية تصنيع هندي أو مصري..مصر بتعمل حاجات احسن من الهند على فكرة وأي حاجة هندي تأكد انها محطوطة علشان رخيصة فقط !
التوكيل والصيانة: خليك عارف حقك وعارف التفاصيل اللي ذكرتها فوق علشان تكون على نور لما حد ييجي يتكلم معاك. مش كل مهندسي الصيانة ينفعوا يكونوا مهندسين. وناس كتير منهم بيقضوا واجب وخلاص واهي شغلانة والسلام. علشان كدة ماتسلمش دقنك وتسيب حد يفتيلك في أي حاجة واسأل واستفسر عن أي تغيير قبل ماتعمله. فيه منهم ناس كدابين وناس مش عارفين شغلهم كعادة أي حد في معظم الأماكن في مصر. لكن هو كتوكيل كويس ومحترم وبيهتم بمعرفة رد فعلك كعميل. ساعتها ماتسيبش حقك ولو فيه نص حاجة مزعلاك لازم تقولها لهم وتعملها شكوى. الكلام عالفيسبوك لا يكفي ومجرد الشكوى والولولة هنا بكلمتين مابتجيبش نتيجة. لو معاك الحق ماتسيبهوش لكن لو قعدت تتكلم وتعيط بدون أي سند هانعرف ان موقفك أصلاً ضعيف وانك مش معاك حاجة تستند عليها في كلامك. أعتقد الصراحة لازم تتقال هنا !!!
السادة الكرام ...
سلام الله عليكم ... ده تقرير واضح عن عربية نيو صني بعد 80 ألف كيلومتر قيادة ... آه أنا عارف الرقم. يعني تقريباً محيط الأرض مرتين ... يعني بالتأكيد انا عارف باتكلم عن إيه ومش بافتي ولا لسة واحد صاحب ابن خالة جدتي جابها من يومين فانا باكتب عنها ... أعتقد كلامي واضح
هاتكلم عن كل جزء بالتفصيل علشان المهتمين سواءً بالعربية كشراء أو كمحافظة عليها أو كأسلوب قيادة آمنة... توكلنا على الله
الجسم خفيف ... ده شئ مفروغ منه ... مصمم لكذا حاجة: تخفيف وزن العربية وبالتالي تقليل استهلاك البنزين ... ومعمول علشان يتفرتك تماماً عند الصدمات وينقل كامل الخبطة للأجزاء البعيدة عن مقصورة الركاب...هاتلاقوا في كل الحوادث واختبارات التصادم (سواءً لنيسان أو فولفو أو غيرها من الماركات المحترمة) ان مقصورة الركاب بتفضل سليمة إلى حد كبير وده في حد ذاته هو الهدف من تخفيف وزن وسمك الصاج والأجزاء الأمامية ...
تصميم العربية شكله مبعجر وشبه البتنجانة المستوية ... مش مهم انا هاستعملها للانتقال مش هاتجوزها لكن بيخليها ثابتة عالسرعات العالية وكمان باحس بمطبات الهواء المتشكلة بواسطة العربيات الكبيرة وهي معدية جنبي حتى لو انا واقف تماماً وسرعتي زيرو ... كل شئ وله مقابل
ارتفاع العربية عن الأرض كويس جداً ونادراً ما بتحك في مطب (مطب غبي زي اللي عامله طبعاً) وده شئ ممتاز للطرق المصرية الأليفة ! ... وكمان ارتفاع العربية سلاح ذو حدين: بيزود ضغط الهواء فوق السيارة عند السرعات العالية لكن في المقابل بيخلي التحكم في السيارة صعب عند المناورات الحادة عالسرعات العالية ... ولا يفضل بأي حال من الأحوال التلاعب بالعربية دي بالذات على سرعات كبيرة ... لو هاتجري بشكل آمن عليك وعلى اللي معاك وحواليك لازم تكون في خط مستقيم على طريق سريع ... غير كدة بلاش هبل واستعباط ...
العربية مصممة للمدينة وللسفر الطبيعي ...مش عربية شد وجري وسباقات ... والكلام ده نعيد ذكره بإذن الله عند نقطة المحرك
الشنطة الخلفية مرتفعة وده بيتسبب في إعاقة الرؤية بشكل كبير عند الرجوع للخلف والركنة بالضهر ... يستحسن تركبلها حساسات ركن وكاميرا خلفية...وذكرت ليه العربية مرتفعة عن الأرض (خصوصاً الجزء الخلفي)
البطارية بتنزل في الكثير من العربيات من الموديل ده 40 أمبير ... ده كافي لتشغيل كل التجهيزات الأساسية... أقصى حد ممكن تجيبه هو بطارية 60 أمبير وأكتر من كدة مالهوش لازمة لأن الدينامو مش هايشحنهالك بأكتر من 60 أمبير.
الإضاءة ممتازة جداً ... مش هاتحتاج (تحت ظروف التشغيل العادية وبدون لعب في الكهرباء) إلى تغيير أي لمبات قبل خمسين ألف كيلومتر بإذن الله ... اللمبات Osram أصلية وموجودة في التوكيل ... الواطي بخمسة جنيه اللمبة والعالي بخمسين ! كشاف الـ "ضباب" ده مجرد لإضاءة ما هو أمام وتحت العربية وهاينفع جداً في كشف المطبات المستخبية المعمولة بنظام شوراعنا تتحدى الملل !! مافيش ضوء بيخترق الضباب مهما كان طوله الموجي علشان كدة انا ضد مصطلح "كشاف ضباب" ده من أصله.
المساحات لطيفة لكن يستحسن تغيرها بنفس المقاس وماتتلاعبش فيه ... ولاحظ ان مواد التنظيف اللي بيحطها التوكيل فوق مية المساحات بتؤدي لنشفانها في المستقبل .... ياريت تكتفي بالمياه العادية وفوقها بعض قطرات جلانس أو ويندكس بتاع الزجاج ... وعن تجربة : المياه لوحدها أنضف في الطرق العادية (لو طرقك زراعية ومليانة هاموش وحاجات بتلزق في الزجاج ابقى زوده جلانس)
المحرك: بدون مبالغة, نص استهلاك المحرك السابق للبنزين للنيسان الشكل القديم ... لاحظ انه 1500 cc وده بالتالي بيفرق بشكل طفيف في قدرات التسارع, اللي هي معمولة علشان خفض استهلاك البنزين. العربية تحت سرعة 60 كيلومتر ساعة بطة بلدي بدون مبالغة, لكن لو حست بانك محتاج تتسارع بتتحول إلى كائن غير أليف فوق سرعة 60 ... ماشاء الله صوت المحرك بيكون منخفض جداً (استعمل زيوت محترمة وأصلية ... الأفضل فالفولاين وليكوي مولي وأحياناً شل العشرتلاف كيلو ... غير كدة مارجحلكش خالص ومش هاتحس بنعومة المحرك). مع صيانتك لعربيتك بشكل محترم ومع إضافتك لمنظف تانك البنزين STP الفضي مع كل تغيير زيت هايكون استهلاك العربية في المتوسط 550 كيلومتر لكل تفويلة تانك
المحرك في التسارع لا يقارن بمحركات هيونداي المتوحشة اللي بتجري على روحها ! بس كمان لاحظ انها محركات عمرها الافتراضي قصير وشرهة للبنزين وغير كاملة الكفاءة. علشان كدة العربية دي مش معمولة للجري واللعب في الشوارع زي المجانين. دي عربية اقتصادية متوسطة تكفيك لمشاويرك العادية وللسفر واستعمال الأسرة.
الجدير بالذكر ان صوت المحرك بيكون عادي أول ماتدور العربية وتسخنها ... وبيهدأ بعد الحركة بفترة
نظام التعليق: العربية حمالة قسية ... شافت كتير وتحملت كتير في طرق مصر اللولبية الخزعبلية ... والحمدلله راضية بحالها وصابرة العفشة هاتبان على أصلها بعد ما تغير الكاوتش من "ماكسيس" (ده بالنسبة للغلابة اللي زيي كانت نازلالهم العربية بيه من المصنع وهو كاوتش ردئ جداً ومش بيتماسك مع الأرض ولا بينفع وقت الفرملة ولا بيعمل اتزان على أي سرعة) إلى نوع كويس ومحترم... جوود يير .. كونتينيننتال ... بريدجستون ... سيموتومو إلخ ...ساعتها هاتحترم بجد نظام التعليق وترفع له القبعة ! ماشاء الله ,, ومش هاكتر في الكلام هنا. وده بالمناسبة بيؤثر على كفاءة الفرامل وبيضعفه طالما انت سايب كاوتش ردئ فيها تماسكه مع الأسفلت وحش جداً ... وكمان هايتسبب في ان فرامل الـ ABS تشتغل كتير وهايقلل من عمرها الافتراضي
لكن هاتحتاج كل فترة انك تكشف بشكل دوري واحترازي على الاتزان والزوايا ... على سلامة المقصات... على كاوتشة التراب للمساعدين (ودي عمرها من 65 ألف كيلو بيبدأ ينتهي)...
أحياناً بيكون فيه صوت تزييقة بسيطة وانت بتركب العربية أو تنزل منها ... التوكيل المصون كان بيقول انها من الكنبة (خاب وخسر من قال ذلك !) هو بس العربية محتاجة تشحيم ... دي كل الحكاية !
الجيربوكس...الفيتيس...وهنا باتكلم على الأوتوماتيك للأسف ماستعملتش العربية المانيوال منها
كثرت الأقاويل عن عدد النقلات ... الفيتيس الأوتوماتيك 4 نقلات فقط في النيوصني...وتفسير انه فوق 120 بيدي نص نقلة دي علشان زيادة تسارع المحرك ليس أكثر ... ومافيش نص نقلة في فيتيس النيوصني ... عندي مثلاً في الشغل عربيات فيها 22 نقلة وفيهم انصاص ... والحلوة خوخة(النيوصني) مش هاتيجي جنبهم حاجة لأن دول استعمالاتهم مختلفة كلياً عن ناقل حركة لعربية سيدان غلبانة
مافيش إحساس بنتشة النقلات المعتادة في الأوتوماتك ... فقط من الأول للتاني عند المطبات وفقط عند المطبات علشان فرق السرعة بين الحركة الفعلية وبين حسابات كومبيوتر العربية بيتغير لمدة ثانية بسبب تأثير المطب على سرعة العربية ... حلوة دي.؟
زيت الفيتيس المفروض اربعة لتر ...ده اللي جوة ... غير كدة بيكون مستعمل للتنظيف وممكن التوكيل يحاسبك على أكتر من كدة للأغراض السابق ذكرها
بيتغير زيت الفيتيس من 60 ألف كيلومتر وطالع ... أحياناً بعد مايكشفوا عليه يطلع انه مش محتاج يتغير حالياً ... لكن هايتغير خلال العشرين ألف كيلومتر التالية.
المحرك ساعات بيحتاج منك تدخل علشان توفر استهلاك البنزين ...لسبب أو لآخر مش بيقلل لفات المحرك وصوت الموتور بيفضل عالي رغم انك خلاص وصلت للسرعة المطلوب الوصول إليها ... ساعتها هاترفع رجلك لمدة ثانيتين من عالبنزين وترجعها زي ماكانت بالظبط ... المحرك هايظبط نفسه تاني لوحده .
لمعلوماتك: عدد لفات المحرك الطبيعية على سرعة 80 كيلومتر بتكون 2000 لفة. على سرعة 100 بتكون 2500 لفة ... على سرعة 120 بتكون 3000 لفة بالتمام والكمال . خدها مقياس ولو عدد اللفات زاد يبقى اعمل الحركة المذكورة فوق ولو فضل زي ماهو يبقى محتاج تظبيط بسيط في التوكيل...غالباً بيعملوا ريسيت لبعض الحساسات في المحرك (الكلام ده موجه للي اشتكوا في بعض الحالات النادرة من زيادة استهلاك البنزين للنيوصني) وهارجع تاني واقول ان التفويلة 41 لتر بتعمل 550 كيلومتر مستريح ... وهاتعمل أقل من كدة لو مشوارك اليومي مش كبير وبتسخن العربية كل يوم مرتين تلاتة ... طبيعي توصل 480 كيلومتر تقريباً لكامل التانك
دواسة البنزين كهرباء مش متوصلة بالكاربياتير بسلك ... بتحسب ضغطة رجلك وتتعود عليها ... وكمان مش بتغير مستوى التسارع لو رجلك ضغطت وفكت كذا مرة بسرعة في فترة قصيرة ... معمول حساب تأثير اهتزازات الطريق على رجلك علشان كدة هاتحافظ على مستوى سرعة العربية ....عايز تغيير سريع في سرعتك ارفع رجلك من الدواسة واضغط تاني بشكل اقوى بعد ثانيتين.
نيجي للنقطة اللي الكل منتظرها: الفرامل !
في الأول كنت من الشريحة اللي جرالها استدعاء للعربية وغيروا حاجة اسمها "صاجة التيل الخلفية" وده عبارة عن الـHousing اللي بيتحط جواه التيل وكانت تكلفته عالية وتحملها الضمان بالكامل...ومن ساعتها ولحد حالاً التيل ماحتاجش يتغير وخلص نصه تقريباً بس , الحمدلله رب العالمين (باتكلم عالتيل الخلفي). العربية كانت بتعمل صوت زي صوت التريللا عند الفرملة على سرعات بطيئة. والحمدلله راحت تماماً
طلعوا بأن فيه كذا عربية محتاجين استدعاء لتغيير ماستر الفرامل...الحمدلله طلع متغير بالفعل في المصنع ... واتغير للناس على حساب الضمان
إشاعة كانت بتقول ان فيه شحنة إيرباجز كانت بايظة ونيسان هاتستدعي العربيات في مصر...اللي حصل ان فعلاً شركة يابانية لوسائد الهواء كان عندها إنتاج معيب اضطر نيسان تصرف ملايين الدولارات على استدعاء عربياتها. لكن جوة مصر ده ماحصلش ...لست أدري ما هو السبب
لكن اللي فوق بيقول ان التوكيل كان بيتحمل مسئوليته ... لما بيوصللهم العيب بيصلحوه وعلى حساب الضمان...ده بقى مايمنعش ان الفتايين موجودين في كل مكان وبالذات في التوكيلات وكانوا بيمنعوا العملاء من حقوقهم في حالات كتيرة ويصروا على ان الضمان مايتحملهاش
يعني الفرامل الأمامية: كانت نوعية مجموعة الفرامل كاملة (تيل-طنابير-كاليبرز) رديئة ومش متجانسة...التيل كان ياكل الطنابير والطنابير تبوظ التيل والصفارة في النص هايصة ... تحس انك سايق تاكسي لادا ماشي 250 ألف كيلومتر
المشكلة حصلت معايا زي باقي الناس... كانت الصفارة بتظهر بعد حوالي عشرتلاف كيلو قيادة... التوكيل في الأول "السبع" راح مدفعني تمن التيل... لكن "أوتو إيجيبت" غيرولي تيل وطنابير 3 مرات على حساب الضمان وآخرهم كان تغيير كامل لكل مجموعة الفرامل ! من ساعتها الدنيا تمام وماشي حوالي 15 ألف على التيل...وكل مايصفر بيصنفروه ولسة باقي فيه شوية كمان بإذن الله
التيل الجديد (مش لنيسان فقط بل لكل الماركات) طالما هو ماشي بنظام كربون , اتشال منه مادة اسمها أسبستوس ... والمادة دي بقت ممنوعة دولياً لأنها مسرطنة وبتسبب السرطان عند الاستنشاق. ممنوعة في الفرامل وممنوعة في مواد البناء حالياً. ودي بقت تخلي كل أنواع التيل عمرها قصير وبيلعب في مدى من 10 إلى 20 ألف كيلومتر فقط
أفضل تيل هو التيل السيراميك وده بيحتاج تغيير كامل لمجموعة الفرامل وبتكون طنابير معدنية مخرمة زي عربيات السباق, هي ممكن تكون غالية لكن التيل بيعدي 70 ألف كيلومتر علشان كدة تمنها فيها. وده هاعمله بإذن الله أول ماخرج من الضمان !
العربية فيها Brake Assistant وده وظيفته يكمل معاك الفرملة لو رجلك ضعيفة أو كان راجل كبير مش قادر يضغط. بيحس بمدى فجائية الضغطة وعلى أساسها بيكمل الفرملة لوحده وللآخر ... ده بيفسر ليه لو واحد بادئ يتحرك بالعربية وفرمل العربية بتكلبش في الأرض مرة واحدة من نفسها لو عمل أي فرملة سريعة.
فرامل العربية كأداء ممتازة جداً جداً ... يعني لو انت محافظ عليها هاتلحقك بإذن الله والستر والحفظ كله من عند الله, لكن الفرملة كسبب من الأسباب ممتازة للغاية. لاحظ ان لو الصوت بتاع الفرامل علي ومشوار البدال بقى طويل ومابقتش تمسك زي الأول...ماتروحش تلزق في العربية اللي قدامك ووقت مايقف تلبس فيه وتروح تقول ده عيب الفرامل هو اللي عمللي حادثة ! ربنا عرفوه بالعقل. لكن لو احتجت فرملة والفرملة ماشتغلتش (لاحظت الكلمة؟) ساعتها تعمل مابدالك وهايكون حقك. لأن خاصية رئيسية انت دافع تمنها ماشتغلتش. وده يفرق بشكل كامل عن خاصية تم استهلاكها ومحتاجة صيانة وأداءها كان وحش بسبب كدة. أكيد تفرق
أعتقد ان لما اقول الكلام ده هايكون بناءً على خبرة زي ماسبق وحكيت ... لا انا عينيا ضيقة ولا اسمي الحاج نيسان علشان يكون ليا أي نوع من أنواع الاستفادة منهم ... علشان كدة هاتلاقي كلامي حيادي وصريح وبيحكي اللي حصل بالظبط. فلو سمحت لو العربية مش عاجباك كدة وخلاص ماتجيبهاش أو روح بيعها. انما ماتتسببش في حالة من البلبلة والتذمر بين ناس دافعين شقا عمرهم فيها ومحتاجين يحسوا بقيمتها الحقيقية...لأنها عربية جيدة ماشاء الله وتنفع في معظم الاحتياجات (باستثناء الشد والجري والحرق والغرز على سرعات عالية)
العربية من جوة كتجهيزات عادية جداً ...هي واسعة بشكل جميل الحمدلله ودي حاجة ممتازة. لكن خامات التقفيل مش جيدة وخصوصاً التابلوه اللي بيزقزق لو انت شغلت التكييف ساخن في البرد ... حجم البلاستك تقريباً بيتمدد وتحس انك راكب ميكروباص الترامكو كل حتة في التابلوه بتاعه رايحة في ناحية ودي حاجة تؤخذ بشدة على نيسان انها تطلع تجهيزات داخلية بالشكل الردئ ده. أنصح بعمل فرش جلد علشان تحس انك راكب عربية شيك بدل الفرش اللي جاي فيها.
لمعلوماتك:
الفيتيس فيها ياباني صنع في اليابان
المحرك بتاعها مش نفس المحرك في أمريكا الشمالية, هناك المحرك 1600 وكمان اسمه إكس ترونك سي في تي
الدينامو مصنع في شركة ميتسوبيشي في اليابان
الضفيرة الخاصة بالكهرباء تصنيع مصري خالص في مصنع هنا في القاهرة
الفرش الداخلي تصنيع شركة سبير كار هنا في مصر
الفوانيس مصنوعة في الهند ... ووزنها أخف بكتير مما كنت تتخيل !
المحرك نفسه مصنوع في اليابان
معظم الأجزاء الداخلية تصنيع هندي أو مصري..مصر بتعمل حاجات احسن من الهند على فكرة وأي حاجة هندي تأكد انها محطوطة علشان رخيصة فقط !
التوكيل والصيانة: خليك عارف حقك وعارف التفاصيل اللي ذكرتها فوق علشان تكون على نور لما حد ييجي يتكلم معاك. مش كل مهندسي الصيانة ينفعوا يكونوا مهندسين. وناس كتير منهم بيقضوا واجب وخلاص واهي شغلانة والسلام. علشان كدة ماتسلمش دقنك وتسيب حد يفتيلك في أي حاجة واسأل واستفسر عن أي تغيير قبل ماتعمله. فيه منهم ناس كدابين وناس مش عارفين شغلهم كعادة أي حد في معظم الأماكن في مصر. لكن هو كتوكيل كويس ومحترم وبيهتم بمعرفة رد فعلك كعميل. ساعتها ماتسيبش حقك ولو فيه نص حاجة مزعلاك لازم تقولها لهم وتعملها شكوى. الكلام عالفيسبوك لا يكفي ومجرد الشكوى والولولة هنا بكلمتين مابتجيبش نتيجة. لو معاك الحق ماتسيبهوش لكن لو قعدت تتكلم وتعيط بدون أي سند هانعرف ان موقفك أصلاً ضعيف وانك مش معاك حاجة تستند عليها في كلامك. أعتقد الصراحة لازم تتقال هنا !!!
