الطريقه الصحيحه لحساب اﻷستهلاك الفعلی للبنزين

استهلاك العربيه للبنزين يعتبر من اهم مقاييس الحاله العامه للموتور وللسياره اجمالا
وعشان كده حبيت اوضح فی البوست ده الطريقه الصحيحه لحساب اﻷستهلاك الفعلی للبنزين فی ای سياره
وعلی فكره
الطريقه دی المتبعه من صانعی السيارات واللی بنشوفها فی ای بروشر اعلان ﻷی سياره
بنلاقيهم كاتبين مثلا ان السياره بتستهلك 7.5 لتر للسير مسافة 100 كيلو


طيب بتتحسب ازای ؟
ده اللی هنعرفه مع بعض دلوقتی

طريقة حساب استهلاك البنزين ﻷی عربيه
هتفول العربيه بنزين لحد الزور يعنی تبقی شايف البنزين بعينك ( امتلاء تام )

هتصفر عداد الرحلات
هتطلع علی طريق سفر بدون ای قرص علی العربيه
آخرك علی كل غيار لحد 2.5 rpm وتنقل للغيار اللی بعده
هتمشی مشوارك علی سرعه من 90 الی 100 علی الغيار الخامس

هتوصل اقرب بنزينه وهنفول تانی للزور
وهتكتب مشيت كام كيلو واخدت كام لتر

طريقة الحساب كاﻵتی
هنقسم عدد الكيلوات اللی مشيناها ولتكن 100 كيلو
علی عدد ليترات البنزين ولتكن 8 لتر هيطلع الناتج 12.5
هنضربه فی 20 ليتر اللی هما الصفيحه
هيطلع الناتج اﻷجمالی 250
يعنی العربيه دی بتعمل 250 كيلو فی الصفيحه علی طريق سفر
وده اﻷستهلاك المتوسط لعربيه 1600 cc
من واقع المعادله
100 ÷ 8 = 12.5 × 20 = 250

المفروض اﻷستهلاك الطبيعی هيكون فی المدی من 220 الی 320 كيلو فی الصفيحه ﻷی عربيه 1600 cc
طبعا المعدل بيختلف من عربيه للتانيه علی حسب السعه اللتريه للموتور وايضا الحاله الفنيه للسياره

يعنی فی العربيات ال 1000 cc المعدل ممكن يوصل ال 400 كيلو فی الصفيحه ( 20 لتر )

مع تمنياتی لكم
بأستهلاك مقبول وقياده آمنه

شكر خاص للزميل عصام غنايم