كما جرت العادة و كما هو مطلوب ... هاحكيلكوا عن إنطباعاتي المبدئية عن السياز و برضو نحط في اعتبارنا إني استلمتها من 4 أيام بس و مشواري من بيتي في 6 أكتوبر لشغلي في مدينة الإنتاج الإعلامي برضه في 6 أكتوبر ( حوالي 40 كيلو رايح جاي) و برضه أنا زي معظم أعضاء الجروب ركبت عربيات كتير قبل ما اشتري السياز (و بحكم إني قعدت في دبي كام سنة و طبعا انتو عارفين إن العربيات هناك أرخص من الأكل فأنا ركبت فئات عالية زي الليكزس و الباجيرو و هوندا أكورد و النيسان مورانو و التويوتا كامري وفئات مش عالية أوي زي التيدا و الشارك
- العربية حجمها الخارجي تقريبا زي الكيا سيراتو الشكل القديم و طبعا أعلي بكتير من على الأرض
- كان في أعضاء علقوا على إن الدهان الداخلي للكبوت و الشنطة مش نفس لون العربية، أنا لقيت الألوان واحدة و مفيش اختلاف ( عربيتي سيلفر)
- البطارية لقيتها جافة مش سايلة
- اللون السيلفر جميل و فعلا سهل في نضافته زي ما معظم الأعضاء سبق و قالوا
- الأنوار حلوة بس مش هايلة، أعتقد الواحد هيحتاج يغير للمبات أعلى
ثانيا: العربية من الداخل:
- تابلوه شيك و المقصورة عامة حلوة و الخامات حلوة مقارنة بمثيلاتها في نفس الفئة السعرية
- أول حاجة عملتها شغلت الراديو و البلوتوث و عملت مكالمة للمدام و كان الصوت هايل جداً للطرفين
- المساحة الداخلية و الشنطة تحفة
- كرسي القيادة حسيته عالي شوية رغم إني كنت منزل دراع التحكم في الارتفاع على الأخر، كمان حسيت الضهر ناشف شوية ، يمكن مع الاستعمال الموضوع ده يختلف
- في بعض الأعضاء اتكلموا عن إن طريقة قفل الباب و شنطة العربية مش أد كده و كمان ان الزجاج الأمامي بيترج في الباب، في الحقيقة أنا ما حاسيتش بالمواضيع ده خالص
- النظام الصوتي جيد جداً و نقي
- مستغرب شوية من إنهم ماعملوش نظام الأوتو لوك للأبواب ( سواء مع أول ضغطة للفرامل أو بعد 10 ثواني من المشي)
ثالثاً: القيادة:
- دواسة البنزين مش مزنوقة و لاحاجة بس يمكن عالية شوية لكن مش بشكل مرهق أو سخيف، و برضه أكيد الواحد بيبقى اتعود على و ضعية قيادة معينة بمقاييس معينة و لما بيغيرها أكيد بيحس بفرق لحد ما يتأقلم على المقاييس الجديدة
- الفرامل حلوة و طبعا أنا ما قرصتش عليها و فرملتي هادية مش مفاجئة
صوت الموتور هادي و المقصورة معزولة كويس
- استجابة السحب ممتازة و فعلا ماحسيتش بفرق بينها و بين ال 1600 سي سي
- باور الدركسيون فعلا ناعم جدا بس برضه مش بيرجع تلقائيا بشكل كامل في الملفات و ده فعلا كان جديد عليا و ماكنتش مستوعبه في أول يومين، بس برضه الدركسيون ثابت و مابيروحش و ييجي فوق الأرض المكسرة و الزلط و الحاجات اللي متعودين عليها في مصر
- العفشة حلوة و العربية عالية عن المطبات و ثابتة (في حدود السرعة اللي كنت بامشي عليها لأني مجربتش أجري بيها)
- حاسس بهزة خفيفة جدا و العربة دايرة حتى و الفتيس علي وضع ال N وماعتقدش ان ده طبيعي مع عربية زيرو، بس بيتهيألي ممكن مع صيانة ال 1000 الموضوع ده يروح
أخيراً و بشكل عام، راض تماما عن قرار شراء السياز و تقييمي العام لمدى إيجابية الانطباع الأول يزيد عن 90% ...
