دليلك للزيت المناسب فى الموتور المناسب

الأول بس عشان نبقى على نور خلينا نتخلص من شوية أساطير غير صحيحة:
● مفيش حاجة إسمها زيت خمستلاف وعشرتلاف.. ده مجرد اجتهاد لجدولة وتنظيم عملية تغيير الزيت.. الزيت بيتغير لما تتغير خواصه ويبدأ يفقد قدرته على التشحيم أو السيلان بكفاءة في المحرك.
● مفيش حاجة إسمها إن ماركة زيت هي الوحيدة اللي تنفع لعربية كذا.. ده بزنس يا باشا وبيضغطوا عليك بالضمان عشان البزنس يتم.. والحقيقة إن صانع الموتور بيكتب لك مواصفة الزيت المناسب للمحرك بتاعه وانت تختار براحتك بين ماركات الزيوت المختلفة حسب جودة المنتج والخدمة المقدمة.
● موضوع إن الزيت كل ما يكون لزج أكتر كل ما يبقى أفضل.. وده كلام غير علمي وهشرح ليه.

● برضه من الأساطير إن الزيت لو لونه بقى إسود يبقى وحش.. والحقيقة إن إسوداده ده معناه إنه قام بدوره في تنظيف شوائب الكربون داخل المحرك ودي حاجة كويسة.. أو إنه إتحرق جوة المكنة وفي الحالة دي بيبان من ريحته ويبقى زيت أي كلام.
خلاص تحررنا من الأساطير؟ طيب يالا نبدأ:
● الزيوت حالياً 3 أنواع.. تخليقي، نصف تخليقي، معدني
التخليقي بيكون عبارة عن مركبات كيميائية بالكامل تعطي درجة سيولة وتدفق داخل المحرك عند درجات الحرارة المنخفضة (في البرد زي بداية الدوارة صباحاً في الشتاء مثلاً)، وكذلك لزوجة جيدة عند وصول المحرك لدرجة التشغيل المثالية وهي 90 درجة اللي بيكون وقتها مؤشر الحرارة عندك وصل للمنتصف تماماً وثبت. وهذا النوع هو أغلاهم.. مناسب للمحركات الجديدة (تحت 130ألف كم) عشان المكنة لسة جديدة والخلوصات بتاعتها ضيقة فمحتاجة انسياب كويس في البرد عشان ما تحتكش ببعضها بدون سائل تليين فمع التكرار المستمر المحرك ياكل في بعضه ويبدأ يظهر بوش بين الأجزاء بدري.
● النصف تخليقي بيكون مركب كيميائي كذلك ولكن مضاف على قاعدة بترولية تُشكِّل حوالي نصف كمية السائل تقريباً.. هيديك لزوجة كويسة في الحرارة لكن إنسيابه داخل المحرك الجديد صباحاً في البرد أقل. وهو أرخص شوية من التخليقي.. مناسب للمحركات المتوسطة (من 130 ألف إلى 250 ألف كم) عشان المكنة بدأ يبقى فيها بوش بسيط بين الأجزاء المتحركة فده يدي اداء جيد معاها لزوجة وانسياب.
● المعدني بيكون عبارة عن مركب بترولي خاااالص عليه شوية إضافات تحسن خواصه.. هيديك لزوجة في الحرارة، لكن الانسياب ضايع في البرد.. مناسب للمحركات الأقدم (من 250 ألف كم وانت طالع) عشان البوش بقى واسع بفعل الاحتكاك والحركة طول العمر ده وانت محتاج زيت تقيل يملأ الفراغات دي لحد ما تخرطه تاني في العمرة إن شاء الله.
● العلامة اللي تعرفك إمتى تنقل من نوع إلى النوع اللي بعده هي إن الزيت يقل في المكنة (بدون تسريب) وذلك على غير العادة، وكما ن صوت المكنة يعلى قبل الموعد المعتاد لغيار الزيت.
طيب أعرف إزاي أفرّق بين التلاتة؟
● التخليقي المعتاد والمناسب للجو مصر في الغالب المواصفة بتاعته بتبقى (5w-30, 5w-40) وبالكتير خالص (5w-50) اللي زي موبيل-وان كدة وده يعتبر تقيل شوية على المكنة الجديدة عشان كدة بيبدأ يخل معاك على 7000 كم
● النصف تخليقي المناسب لمصر برضه المواصفة بتاعته (10w-40, 15w-40)
● المعدني المواصفة بتاعته (20w-50) اللي زي موبيل xhp
من الكلام اللي فات ده طبعاً نفهم ليه لما حضرتك بمنتهى الطيبة بتحط xhp في محرك يعتبر لسة زيرو (أقل من 100 ألف) بتسمع الموتور بيجعر وصوته عالي.. هو في الحقيقة بيستغيث وبيطلب الرحمة لأن الزيت كابس على مراوح قلبه ومحتاج زيت أخف.
تبقى بعض الملاحظات:
● شخصياً بشجع المنافسة بين شركات الزيوت عشان اضمن إنهم يفضلوا يطوروا من مستوى جودة زيوتهم وأنا المستفيد
● شخصياً برضه بفضّل الزيوت المستوردة فقط لضمان رقابة الجودة على المنتج واتطمن إنه مش مغشوش ومضروب في أي حتة جوة مصر بناءً على سمعة وكيله.